مين يجيرك ..؟

جيت غمامة حنينا دافق
وإنتشلت الروح من النوح و الكآبه ..

انتصرت علي الظروف القبل ما تلاقيني ما دسّت حرابا ..

و جيت بحر و انا كنت من قبلك عتامير بالجفاف ممهور تُرابا ..

و كنت بحلم بالدميره و بالمطور السارجه خيرا و بالبروق المستطابه ..

و غنّت الروح لي عيونك يا العيونك مرحبابا ..

و هلّل البوح ..
مين يجيرني من الحروف الواقعه في فخ الكتابه ..

مين يجيرني من المسافات البتبعد بينّا و الوطن المنتّف ..

مين يفك قيد الحقيقه و يطلق الفرح المكتّف ..

مين يفضّي المنفى من باقي المطاريد الحليلن
 و المطار اللسه بالراحلين مستّف ..

مين يحلك يا بلادي السمحه من هادي العصابه ..


يا البلاد الراميه فوق اكتافنا ريدا ..

يانا من جدعة ضفايرك في ضهر أجمل قصيده ..

و يانا من وجع المسافات التودي عليكي و السكك البعيده ..

ارمي حيلك كلّو فينا

و اندهينا .. نجيكي سارجين المواعيد الأكيده ..

و ايدنا في ايد البشاره ..

 و روحنا في نوره و وجيده ..

اجمل عاشقين ..

و كسرت خاطر الإحتمال .. ما عاد يهم ..
كل الجروح الفيني بتسلم عليك ..
تهديك ورود العافيه خليك مبتسم ..
ما ترتى لي وجع الحروف
الكلما تطراك عيونا بتنهزم ..
و الكلما ضاقت عليك الدنيا بتمدك وساع
من ذاتا شان خاطر عيونك تنقسم ..
بتهاتي بيك يا بكره اجمل ما يكون
كل المواسم فيني عاد تنده ربيعك بالإسم ..
بتغني بي أصدق حنين
تفتح عليك شارعين فرح
تمسح دموع الفرقه و الخوف ينعدم ..
و تعمِّدك فوق الأحاسيس و الشعور آخر نبي ..
و من تاني تشتاقك حلم ..
ترجاك وكت يطلع نجم ..
يطعن ضمير العتمه بي حربة شعاع
يشرق صباح الرجعه و الفات ما مهم ..

وسّد غماماتك سماي
و انا و انت يلاك البحر ..
كل الوصايا العندي ليك
تلقاها في خيت الشروق المن رحيلك ما ظهر ..
لا بان وراك غير الحنين القددت روحو الإبر ..
طافت علي خاطري المعاك لحظاتنا يوم كنتك قمر ..
هاك عيني شوف كيفن بشوفك يا الحبيب
محتشده جواي الصور ..
كل الإحاسيس احتفت بي ذكرتك ..
وسع مدارك اللقيا بي جن فكرتك ..
ببنيك علي مد الأماني البور مداين من عشم ..
بنفض غبار الغيبه لو دخل النفس جوايا و اصطحبك شهيق ..
و اتوصى بيك يا ضل ضحاي الرامي في تعب السنين ..
و امشيك علي كيف الديار ما تنادي شوق الغائبين ..
نتلاقى في طرف البحر ..
نتهادى يبرانا الحنين ..
و نكون كما شاء القدر
انا و انت اجمل عاشقين ..

..

ادمنت فيك سمح الغنا ..

انا في الزمانات القديمة حلمتَ بيك

فارساً يشق عتم المداين الواقعة في عرض الضلامات والألم ..

انا في المواقيت الحنينة رجيتا رنة صوتك الدَفِي يا رسول الغنوة من قلب النغم ..

تاكيتا أبواب المغارب لي دخول القمرة  في ساحة المسا وفتّحتَ طاقات العشم ..

لوّحتَ ليك يا مُستفز كل الحواس والخاطر البدا بيك يصيح ..

الألسن الما بتذكرك ضهبانة في اللكنة الطشاش

علمتها النطق الصحيح ..

لي كُلْ حروف الريدة والعشق البعد جَيْتَك صِبح يتهجّى في الشوق الفصيح ..

علمّتَ عينيّ السهاد وسّدْتها الشجن اللديح ..

واديتا أسباب النويح ..

أنجدني من نبح الظروف والوحشة في غيبة الطيوف

واكتب علي ضهر ايّ ريح :

 بمشيكي يا بت القلب ما كلّت الروح الرحيح ..

اكتبني يتنّزل عليك وحيّ الغناوي المرهفة ..

شجن البلاد الشايلة من زحمة تفاصيلك ملامح المعرفة ..

فرح المحطات الحزينة الراجية ايقاع خطوتك يوم بيك تجود الأرصفة ..

واكتبني عنوان للحبيبات الولا بعرفن خلاف صدق الوفا ..

وارجاني في باب العمُر ..

بشرت بيك الأضرحة وكل الدروايش الخُدُر ..

كل المجاذيب القبيل في الحضرة ندهوا عليك كُتُر ..

كل النسايم والهبوب الكلما هبّ الجمُر ..

في ذاتي تطفيهو وتمُر ..

بشرّت بيك عطش الهوايد اللسة راجية مطورك الدفّاقة بي حُترُب صبُر ..

بشّرت بيك قلبي المُمَزّق جِلدو في دارة الشتات ..

يا ود عيون الامنية الصَدَقَت بعد يِبْسَن فصول الامنيات ..

جيت من مواني الدهشة والوَلَه القِدِر فرّق غبار الذكريات ..

جيت في مواسم الرجعة لي زمن القلب مُشرَع غناوي وأُحجيات ..

شتتّا بذرة همبريب في تربة المدى والجهات ..

ودخلت في النفس البمدني بالحياة ..

رتبت ألوان الفصول ..

وطبعتَ صورتك في تقاسيم ايّ زول ..

أهديت عيون العاشقين عنوان شوارع الريدة ،

خارطةَ الوصول ..

واهديتني قمرة اتمرَدت على كل قوانين الاُفُول ..

انا بيك كسبتَ معاركي ضد زمني العنيد ..

انا ليك نذرتَ الجايي من رحم التواشيح والقصيد ..

علّقت في جيدك تمايم عشمي والضحكة التلاوح من بعيد ..

يا أول احساس بالحياة وموعد رجوع فرحي الأكيد

أدمنت فيك سَمْح الغُنا ..

علّمت بنّوت الشعِر شَغَب الحواس والشيطنة ..

وعلمتهن قِدّام طواويس الكلام الإحتجاج والطنطنة ..

وعشق الطمي ..

وطعم النهارات المكندكة بالهنا ..

وحس القطارات والسفن ..

تضميد جراحات المُدن ..

بالبسمة فرتاقة العنا ..

وانا لسه بتعلّم كتير

يا الفيك لقيت كل المُنى ..

وادمنتَ فيك سَمْح الغُنا ..

غناوي الريح

علي صهوة جواد الريح سرجنا غنانا  
جينا علي الصباحات خير ..
دفقنا أو اندفقنا نشيد 
موزّع في لهاة الطير ..

وغصباً عن قوانين الفجيعة رقصنا
واتلاقينا في ناصية جرح جواني .. 
إتطايبنا واتشربك عمرنا أماني ..
واتماشينا في درب الليالي الحالكة
إتقاودنا في مشوار قصيد واغاني ..
جات منسابة  .. زي الدم وايقاعاتو 
في شرياني .. 
إتمازجنا فنجان قهوة  .. 
ناي وضفيرة ..
واتقاسمنا نفس السيرة ..
والبرق اللمع في العين ..
ونفس الكاس ..
وإتواردنا نفس الحيرة ..
نفس الضحكة ..
والفكرة التحوم في الراس ..
ونفس المركب القاطع جزاير الريدة فارد سارية الاحساس ..
واتلاقينا في الصحرا ورمينا علي الهجاير ضل ..
وصالحنا الحراز والمطرة
أصبحت المواسم فل ..

وهبّت ريح غناوي حميمة ..
هبّت ناري يا شوق ما انطفتلو عزيمة ..
شوق غلباوي
لكن عينك انت رحيمة ..
دا الصبّرني يا مدّاح قوافي الرجعة للبلد الفراقا هزيمة ..
ميّة منفى
والروح في أوج الحوجة لي شوفة قمر متواري
يا قدّاح شرار الفرحة في جوف القصايد ديمة ..
أسمع مني قصة قديمة ..
كان من بدري اتلاقينا
في عينين طيابا غلابة ..
في هبة نسيم
في ضحكة
في ضل نيمة ..
في وردة وفراشة ونحلة ..
في حلم الصباح الأحلى ..
في وهج الشموس البِكرة
في طلة صبية وسيمة ..
في كل سُنبلاية و بذرة ..
في مقطع موسيقى وفكرة ..
في غفلة زمن عن ذكرى ..
في التسبيح
وآية الكرسي والأوراد ..
واتلاقينا والعشق الكبير ميعاد ..
وشلنا جميل غنانا الزاد ..
وشوقنا الزاد ..
وإتعارفنا قبل الخطوة تعتر في دروب الوجعة ، 
قُبّال صرخة الميلاد ..
وقُبّال النجوم ما تبدا تنثر في البعيد احلامنا والحزن اللي كان وقّاد ..
وقُبّال الكلام ما يبدا قبل الشعرا ينضمو في الغنا المعتاد ..
ونحمد ربنا اتعارفنا قُبّال الاماني الخدرا تبقى رماد ..

ويا السفر ، البلاد ، السكة ،
يا الصي المطورو غياب ..
ويا العشق البيدفق نورو
في القمر الحضر .. و الغاب ..
وفي الشعر الصدح عصفورو
فتّح للقصايد باب ..
وفتّح وردي جيتك بالحدايق جُملة
نهر الريدة في جوة الوريد مُنساب ..

واتقالدنا يا ود المطر حين ورطة ،
حين حنيّة ..
في درب الحنين اشواق عليك مرميّة ..
في بحر السنين امواج تلاطم الجيّة ..
رب المُتعبين يجمعنا ،
او يرفعنا ..
هو البسمعنا .. قُبّال بينّا تسري النية ..
تبقى الأمنيات البينّا بي سمح الظنون مقضية ..
نمرُق إيدي في ايدك نراحم لليتامى
ونقلد اولاد الشوارع ..
نفتح الاحضان مشارع .. للمطر ..
والجايي من خيراً ملامحو بتشبهك ..
أو صوتي يمرق واندهك ..

يا جايي من آخر سفر
وانا جاية من ضلع الحرازات الرحيم ..
لاقيني في ريد مستقيم ..
وامشيني ما تعبت خُطاك في سكة العشق الحميم ..

بيناتنا تتلاشى الصحاري الناذرة جرحها للجفاف ..
تصحى الحواري و تنتفض كل الشوارع بالهتاف ..
ينزل فرح
خلق الله تبرى من السموم ..
تسري النسيمات اللُطاف ..
بالبينّا نتحدى الهموم ..
تسكُت جراح بلدي السنينا وراك عجاف ..
ما دُمنا والأشواق كُتُر ..
واحلامنا اكبر من نخاف ..
يا تومي بيناتنا العُمُر
انا وانت لي آخر المطاف ..

********

باب مَتَـاكَى

ﺍﻟﻤَﻠــــﻤَّﺎﺕ ﺍﻟﺒﻀُﻤـــــﻨَّﻚ .. ﺣِـﻠﻴﻠِﻦ ..

ﻭﺍﻟﻤﺸﺎﻭﻳﺮ ﺍﻟﺒﺠﻴــــﺒﻨَّﻚ .. ﺣِـﻠﻴﻠِﻦ ..

ﻭﺍﻟﻘﻠﻮﺏ ﺍﻟﺘﺎﻳﻬـة ﻓﻲ ﻏﻴﺒﺔ ﺩﻟﻴﻠِﻦ ..

ﻗَﻄَّﻌـِﻦ ﺻَﺒُﺮِﻥ ﻋﻠﻴﻜﺎ ﻭﻗَﻄَّﻌَﻦْ ﺑﺎﻵﻫـة  ﻟﻴﻠﻦ ..

ﺍﻟﻔﻮﺍﻧﻴﺲ ﺍﻟﺘﻼﻭﻱ ﺍلضلمة ﺿَﻮَّﻫﺎ ﻣﺎ ﺑﺠﻴﺒَﻚ ..

ﻭﺍﻟﻘﻮﺍﻣﻴﺲ ﺍﻟﺘﺸﻴﻠﻚ كلمة ﻣﺎ ﻭﺍﺯﺕ ﻧﺼﻴﺒَﻚ ..

ﺍﻟﻤﻄﺎﻣﻴﺲ ﺍﻟﺒﻴﺠﺮﻭ ﻋﻠﻴﻚ ﻭﻣﺎ ﺧﺎﻳﻔﻴﻦ ﻟﻬﻴﺒَﻚ ..

ﺯﻱ ﺣﺒﻴﺒﺎً ﺭﺍﺟﻲ ﻓﻲ ﻛﻞ ﺍﻟﻤﻮﺍﺳﻢ ﻫﻤﺒﺮﻳﺒَﻚ ..

ﺑﺎﻉ ﻳﻘﻴﻨﻮ ﻭﺇﺷﺘﺮﺍﻛﺎ ..

ﺷﺪَّ ﺣﻴﻠﻮ ﻋﻠﻲ ﺍﺑﺘﺴﺎﻣﺘﻚ

ﻭﺍﺑﺘﺴﺎﻣﺘﻚ ﺑﺎﺏ ﻣﺘﺎﻛﻰ ..



ﺃﻣﺎ ﻋﻴﻨﻴﻚ ﺩﻳﻞ ﻣﺮﺍﻛﺐ

ﻭﺍﻟﺮﻭﺍﻭﻳﺲ ﺳﺎﻧﺪة ﺣﻴﻼ ﻋﻠﻲ ﺷﺒﺎﻛﺎ ..

ﻭﻓﻲ ﺭﻣﻮﺷﻚ ﻧﺎيمة قيفة ..

ﺻﻮﺗﻚ ﺍﻟﺸﻤﺲ ﺍﻟﺒﺘﻄﻠﻊ ﻃﻠﻌﺔ ﺍﻟﺮﻭﺡ ﺍلنضيفة ..

ﻭﻫﻤﺴﻚ ﺍﻟﻨﻔﺲ ﺍﻟﺒﻴﻘﻄﻊ

ﺻﻤﺘﻚ ﺍلمتعة ﺍلمخيفة ..

ﻭﺟﻨﺰﺑﻴﻠﻚ ﻳﺎﻫﻮ ﻧﻴﻠﻚ

ﻧﻜﻬﺔ ﺍﻟﺒﻦ ﺍﻟﺤريفة ..

ﻭﺳُﻜَّﺮَﻙ ضحكة  وﺭﺑﺎبة

ﻭﻏﻨﻮة ﻣﻦ ﻋﺼﺐ ﺍﻟﻜﺘﺎبة

ﻭﻃﻌﻨـة ﻓﻲ ﺍﻟﺤﺎﺳـة ﺍلرهيفة ..

ﺣﻠﻤﻚ ﺍﻻﺧَدَﺮ ﻣﺸﺘﺖ ﻓﻲ ﺍﻟﺒﻮﺍﺩﻱ

ﻓﻲ ﺍﻟﻤﺪﺍﻳﻦ ﺍﻟﻔﺎضية ﻣﻦ ﻫﻤﺞ ﺍﻷﻧﺎﺩﻱ ..

ﻭﻓﻲ ﺍﻟﻮﻻ ﺑﺎﻋﻦ ﺿﻤﻴﺮﻥ ﻟﻠﻤﺤﻄﺎﺕ ﻭﺍﻟﺮﻭﺍﺩﻱ ..

ﻭﻓﻲ ﺍﻟﺒﻴﺎﺽ ﺍﻟﻤﺎ ﺑﺒﻴﻊ ﺍﻟنِّيَّة  ﻓﻲ ﺳﻮﻕ ﺍﻟﺮﻣﺎﺩﻱ ..



ﻟﻮ ﻟﻘﻴﺘﻚ ..

ﻛﻨﺖ ﺳﻮﻳﺘﻚ تَمِيمة ..

ﻛﻨﺖ ﻋﻠَّﻘﺘﻚ ﻋﻠﻲ ﺟﻴﺪ ﺍﻟﻐﻨﺎﻭﻱ ﺍﻟﺤﻠﻮة  وﺍلكلمة ﺍﻟﺮحيمة ..

ﻛﻨﺖ ﺳﻤّﻴﺘﻚ ﻣﻮﺍﻧﻲ ﻭﻧﻴﻞ ﻭﻏﺎبة

ﻭﻛﻨﺖ ﺑَﺘﺪﻓَّﻖ ﺻﺒﺎﺑـة

ﻭﺗندفق ﻣﻦ ﻋﻴﻨﻲ غيمة ..

ﻭﻭﻋﺪ أﺧَدَﺮ

ﺑﻜﺮة ﻳﻜﺒﺮ ﻭﻳﺒﻘﻰ نيمة ..

ﺗﺮﻣﻲ ﺿﻠﻬﺎ ﻟﻠﺒﻴﺴﻠِﺒﻮ ﺷﻮﻕ ﺷﻮﺍﺭﻋﻚ

ﻛُﺖْ ﺑﻔﺘﺶ ﻋﻦ ﻣﺸﺎﺭﻋﻚ

ﺗﻨﻔﺘﺢ ﺗﺎﻻ ﺍﻟﺸﺮﻭﻕ ..

ﻛُﺖَّ ﺑﻤﺰﺝ ﺑﻴﻦ ﺣﻨﻴﻨﻚ  وﺍﻟﻤﺴﺎﺭﺍﺗﻮ ﺍﻟﻌﺮﻭﻕ ..

ﻛُﺖَّ ﺑَــــﺘﻮﺭّﺩ ﻭَﻛِﺖْ ﻳَﻌﺒُﺮﻧِﻲ ﺷﻮﻗﻚ

وﺗﻌﺘﺮﻳﻨﻲ ﺍﻟﻔﻮﺿﻰ ﻳﻐﻠﺒﻨﻲ ﺍﻟﻤﺮﻭﻕ ..

ﺍﻧﺎ ﻛُﺖَّ ﺑﺘﺬﻛﺮ ﻋﻴﻮﻧﻚ

ﻭﻟﻤﺎ ﺃﺗﺬﻛﺮ ﻋﻴﻮﻧﻚ

ﺗﺎﻧﻲ ﺃﺗﺬﻛﺮ ﻭﺍﺭﻭﻕ ..



ﺧـﻠﻲ ﺑﺎﻟﻚ

ﻟﻠﺤــبـﻴﺒﺎﺕ ﺍﻟﻐـــﻨﺎﻭﻱ ..

ﺍﻟﺒﻬــﻴﺎﺕ ﺍﻟﺒﻤﺮﻗﻦ ﻓﻲ ﺍﻟـﺤــﻮﺍﻟِﻚ ﺑﺪْﺭِ ﺿﺎﻭﻱ ..

ﻭﻳﺮﺳــﻤـﻦ ﺗﻠﻮيحة ﻟﻲ ﻓﺠــﺮﺍً  ﺳﻌـــﻴﺪ ..

ﺍﻟﺤــﻨـﻴﻨﺎﺕ ﺍﻟﺒﻔَﺮﺯِﻋــﻦ ﺍﻟﻬﻮﺍﺟـــﺲ

ﺛﻢ ﻳﺘﺨــﻄﻰ ﺍﺷـــﺘﻴﺎﻗﻦ ﺃﻱ ﺣـــﺎﺟﺰ

ﻭﻳﺸﻌــﻠﻨﻚ ﻧﺎﺭ ﻗﺼــﻴﺪ ..

ﺍﻟﻤﺤــﻄﺎﺕ ﺍﻟﺤـــكاﻭي

ورفقة الروح والخطاوي

البسندنك لما عن دربك تحيد ..

ﺩﻳﻞ ﺍﻟﺒﻴﺮﻣـــﻨّﻚ ﺗﻘﺎﻭﻱ

ﻭﻳﺸــﻤﻠﻨّﻚ ﺑﺎﻟــﻌﻨﺎﻳـة

ﻭﻳﻤﺮﻗــــﻨّﻚ ﺯﻭﻝ ﺟﺪﻳﺪ ..



ﺧﻠّﻲ ﺑﺎﻟﻚ ﻟﻠﻤﺸﺎﻭﻳﺮ ﺍﻟﺒﻬﻴــة ..

ﻟﻠﻌﺼﺎﻓﻴﺮ ﺍﻟﺘﺰﻏﺮﺩ

ﻛﻠﻤـــﺎ ﺭﻗﺼﺖ ﺻـﺒﻴَّـة ..

ﻟﻠﺤﺮﺍﺯة ﺍﻟﺸــﺎﺩة ﺣﻴﻼ

ﻋﻠﻲ ﺍﻟﻈﺮﻭﻑ ﺍﻟﺼﻌﺒـة ﻭﺍﻟﺮﻳﺢ ﺍﻟﻌـﺘﻴـة ..

ﻭﺧﻠﻲ ﺑﺎﻟﻚ

ﻻ ﺗﻤــﻮﺕ ﻓﻲ ﺍﻟﻘﻠْﺐِ ﻧﺒﻀـة ﺑﻨﻔﺴﺠﻴـة ..




****

11/11/2014

لوحة تانية

ﻋﻠﻲ ﺫﻣﺔ ﺻﺒﺎﺣﺎﺗﻚ

ﺭَﻫَﻨْﺖَ ﺍﻟﺨﻄﻮة ﻭﺍﻟﻤﺸﻮﺍﺭ ..

ﻣَﺮَﻗﺖ ﻣﻦ ﺍﻟﻤﺴﺎفة ﻋﻴﻮﻥ

ﺗﺠﺎﺑﺪ ﻓﻴﻨﻲ ﻣﻦ ﺣﺰﻧﻲ

ﻭﺗﻬﺶ ﻇﻦ ﺍﻷﺳﻰ ﺍﻟﻮَّدَّﺍﺭ ..

ﺳَﻠَﺒْﺖَ ﺍﻟﻠﻴﻞ

ﻣﻨﺎﺣﺎﺕ ﺍﻟﺼَّﺒﺎﺑـة ﺷﺮﻭﻕ ..

ﻣَﺮَﻗْﺖَ على ﺍﻟﻘﻮﺍﺳﻲ ﻧﻬﺎﺭ ..

ﺳﻨﻴﻦ ﻣﺎ ﺟﺎﺑﺘﻚ ﻟﻠﻌﻴﻦ 

ﻭﻻ ﺷﺎﻟﺖ

ﻣﻦ ﺍﻟﻘﻠﺐ ﺍﻟﻤﻠﻴﺘﻮ ﺣﻨﻴﻦ ﺑﻮﺍﻗﻲ ﺍﻟﻠﻬﻔـة

ﻳﺎ ﻣﻨﺸَﺮِّﻱ ﻓﻲ ﺍﻟﺨﺎﻃﺮ

ﻣَﻌَﻠَّﻖ ﻓﻲ ﺍﻟﺸﻬﻴﻖ ﺗﺬﻛﺎﺭ ..

ﻣَﺸَﻜَّﻦْ ﻓﻲ ﺍﻟﻌﺮﻭﻕ ﺍﺣﻼﻡ

ﺗَﻄَﻤِّﻦْ ﻭﺍﻟﺠﺮﺡ ﺗﺎﻭﺍﺭ ..

ﻣﺮﺍﻭﻳﺪَﻙ

ﺗﺤﺰ ﻋﻴﻦ ﺍﺷﺘﻬﺎﻱ ﻓﺮﻗـة

ﻭﺗﺒﺎﺭﻳﺤَﻚ

ﺗﺰﻳﺪ ﻣﻦ ﺗﺎﻧﻲ ﺗﺠﺮﻳﺤﻚ

ﻋﻠﻲ ﻣﺮﻛﺐ ﻓﺮﺡ ﺑﺮﺟﺎﻙ

ﺗﻬﺐ ﻓﻮﻕ ﺍﻟﺸﺮﺍﻉ ﺭﻳﺤﻚ ..

ﻓﻼ ﺍﻧﻔﺘﺤﻦ ﺳﺠﻮﻧﻲ ﻋﻠﻴﻚ

ﻭﻻ ﺍﻧﻮﺟﺪﻥ ﻣﻔﺎﺗﻴﺤﻚ ..

ﻓﻴﺎ ﻣﺎﻓﻴﺶ ﻣﺤﻞ ﻧﻄﺮﺍﻙ

ﻧﺸﻮﻑ ﻓﻲ ﺟﻮﻓﻨﺎ ﺗﺘﺮﺍﻗﺺ ﻣﺮﺍﺟﻴﺤﻚ ..

ﺗﻤﺶ ﻓﻲ ﺳﻜـة ﻣﺎ ﺑﺘﺠﻴﺐ ﺳﻮﻯ ﺍﻻﺣﺰﺍﻥ ..

ﻣﺪﺍﺭِﻙ ﺷﻮﻓﻲ ﺗﺘﻮﻛَّﺄ ﻋﺼﺎ ﺍﻟﺤﺮﻣﺎﻥ ..

وﺗﻮﻗِــــﺪ ﻓﻲ ﺍﻟﻤﻨﺎﻓﻲ ﻏﻨﺎﻙ

ﺗﺠﻴﺒﻚ ﺗﺎﻧﻲ ﻟَﻲْ ﺃﻭﻃﺎﻥ ..

ﻣﺰﺧﺮﻓـة ﺑﻲ ﻋِﺸِـــﻖ ﻻﻭﺍﻱ

ﻣﺤﻨﺪﻛـة ﻭﺍﻟﺴﺤﺎﺏ ﻛﺎﻭﺍﻱ ..

ﻣﻮﺍﻋﻴﺪ ﺍﻟﺨﺮﻳﻒ ﺍﻟﺠﺎﻱ

ﻣﺘﻴﻦ ﺇﻥ ﻟﻢ ﺗﻜﻮﻥ ﺍﻵﻥ ؟!



ﺻَﺒَﺮْﻧﺎ ﻓﺘﺮ ﺻَﺒُﺮْﻧﺎ ﻭﻣﺎﻝ ..

ﻧﺼﺎﺑﺢ ﻓﻲ ﺍﻟﻘﻮﺍﺳﻲ ﺍﻟﺸﻮﻡ

ﻳﻤﺎﺳﻲ ﻋﻠﻴﻨﺎ ﻧﻔﺲ ﺍﻟﺤﺎﻝ ..

ﻧﺤﻨﺲ ﻓﻲ ﺍﻟﻨﻬﺎﺭ ﻟﻤﺘﻴﻦ ..

ﻳﻤﺪ ﺍﻳﺪ ﺍﻟﺸﻌﺎﻉ ﻧﻤﺮﻕ

ﻣﻦ ﺍﺟﺤﺎﺭ ﺍﻟﻜﺘﺎﺑـة ﻳﻘﻴﻦ ..

ﻧﻬﺰ ﻓﻮﻕ ﻋﺰﻙ آاﻟﻤﺮﻳﻮﺩ

ﻏﻼﺑـة ..

ﻃﻴﺎﺑﻰ ..

ﻣﺘﻠﻤﻴﻦ ..

ﺍﻣﺎﻧـة ﻋﻠﻴﻚ

ﺗﺮﺵ ﻓﻮﻕ ﺍﻟﺒﻠﻮﺩ ﺫﻛﺮﺍﻙ ..

ﻗﺪﺭ ﺗﺴﺮﻑ ﻗﻠﻮﺑﻨﺎ ﺭﺣﻴﻞ

ﻋﻠﻲ ﺫﺍﺕ ﺍﻟﺮﺣﻴﻞ ﻧﺒﺮﺍﻙ ..

ﺗﺸﺨﺒﺖ ﻭﺍﻟﺼﺤﻴﻔـة ﺍﻟﺮﻭﺡ

ﻋﻴﻮﻥ ﺍﻟﻌﺎﻟﻤﻴﻦ ﺗﻘﺮﺍﻙ ..

ﺗﻀﻤﻚ ﺿﻔﺘﻴﻦ ﺍﻟﻨﻴﻞ

ﻣﺤﻞ ﻳﺸﺮﻕ ﻋﻠﻴﻚ ﺍﻟﻠﻴﻞ

نمرﻗﻚ ﺿﻮ ﻋﻠـى ﺍﻻﻓﻼﻙ ..

ﺗﺴﻮﻗﻨﺎ ﻋﻠﻲ ﺍﻟﻤﺤﻞ ﻏﻴﻤﺘﻴﻦ

ﺗﺸُــﺮ ﻓﻲ ﺍﻟﻜﺘﻤـة ﻫﺪﻡ ﺍﻟﺮﻳﺢ ..

ﺳﻜﺎﻛﻴﻦ ﺍﻟﻐﻴﺎﺏ ﻓﻲ ﺍﻟﺠﻮﻑ

ﺑﺘﻨﺤﺮ .. ﻭﺍﺷﺘﻬﺎﻙ ﺗﺠﺮﻳﺢ ..

ﺷﻨﻮ ﺍﻟﺨﻼﻧﺎ ﻣﺬﻫﻮﻟﻴﻦ

ﺷَﺮَﻕ ﺣﻠﻖ ﺍﻟﻘﺼﻴﺪ ﺻﻮﺗﻚ ..

ﻓﻮﺍﻧﻴﺴﻚ ﺗﻀﻮﻱ ﺍﻟﻠﻴﻞ

ﺳﻼﻡ ﻣﺎ ﻏَﻴَّﺒِﻦْ ﻣﻮﺗﻚ ..

ﻭﻻ ﺍﺭﺗﺤﻠﻦ ﻧﺠﻮﻣﻚ ﻋﻦ

ﺷﺮﻭﺩ ﺍﻟﻘﻤﺮة ﻓﻲ ﺳﻜﻮﺗﻚ ..

ﻭﻻ ﺑﺎﻋﻦ ﻫﻮﺍﻙ ﻟﻠﻴَﻢْ

ﻭﻛِﺖْ ﻣﺸﻰ ﻓﻴﻬﻮ ﺗﺎﺑﻮﺗﻚ ..

ﻋﻠﻲ ﺟﻮﻋﻚ ﺗﻤﺪ ﺍﻟﺨﻴﺮ

ﻋﻠﻲ ﺍﻟﻔﺎﺗﺤﻴﻦ ﺧﺸﻮﻣﻦ ﻟﻴﻚ

ﻋﻴﻮﻧُﻢْ ﻓﻲ ﻗﻠﻴﻞ ﻗﻮﺗﻚ ..

ﻭﻳﺎ ﺻﻮﺗﻚ ..

ﻭﻛﺖ ﻳﺼﺪﺡ ﺗﻐﻨﻲ ﺍﻟﺮﻳﺢ ..

ﺗﺮﺍﻗﺺ ﻓﻲ ﺍﻟﺸﺪﺭ ﻭﺍﻟﻄﻴﺮ

ﺗَﻨَﺤِّﻲ ﻣﻦ ﺍﻟﺪﺭﻭﺏ ﺍﻟﺸﻮﻙ

ﺗﺴﻮﻗﻨﺎ ﻣﻦ ﺍﻟﺰﻣﺎﻥ ﺍﻟﻘﻴﺢ ..

ﺗﻔﺞ ﺍﻟﻮﺍﻃـة ﻳﻤﺮﻕ ﺿﻮ

ﺯﻏﺎﺭﻳﺪاً ﺗﺸﻖ ﺍﻟﺠﻮ

ﺗﺮﺍﻧﺎ ﺑﺮﺍﻧﺎ ﺑﻴﻜﺎ ﻧﺼﻴﺢ ..

ﺯﻣﺎﻧﺎً ﻋﺸﺖ ﻓﻴﻬﻮ ﻧﺼﻴﺢ ..

ﻣﻜﺎﻧﺎً ﻛﻨﺖ ﻓﻴﻬﻮ ﻓﺴﻴﺢ ..

ﺍﻣﺎﻧﺎً ﻭﺍﻧﺖ ﻣﺎﻓﻲ ﻛﺴﻴﺢ ..

ﺃﻣﻞ ﻣﺸﻠﻮﻝ ..

ﻋﻠﻲ ﺫﺍﺕ ﺍﻟﻨَّﺴَﻖْ ﻭﺍﻟﻘﻮﻝ ..

ﺳﻼﻡ ﻳﺎ ﻃﻴﺐ ﺍﻻﺣﺴﺎﺱ

ﻋﻠﻴﻚ ﻣﻦ ﻛﻞ ﺣﺘـة ﻭﺯﻭﻝ ..

ﻋﺪﺩ ﻣﺎ ﻓﻲ ﺍﻟﻐﻨﺎﻭﻱ ﺣﻨﻴﻦ

ﻋﺪﺩ ﺳﻜﻚ ﺍﻟﺤﻜﺎﻭﻱ ﺗﻄﻮﻝ ..

ﺳﻼﻡ ﻣﻦ ﻛﻞ ﻭﺭﺩﺓ ﺷﻮﻕ

ﺭَﻭَﺕ ﻣﺎ ﺻﺎﺏ ﻋﺮﻭﻗﺎ ﺫﺑﻮﻝ ..

ﺳﻼﻡ ﻣﻦ ﻛﻞ ﺯﻭﻝ ﻣﺸﺘﺎﻕ

ﺳﻼﻡ ﻳﺎ ﺃﻧﺒﻞ ﺍﻟﻌﺸﺎﻕ

ﻋﺪﺩ ﻣﺎ ﻳﺴﺘﻄﻴﻊ ﺍﻟﻘﻮﻝ ..

ﻋﻠﻴﻚ ﻳﺎ ﺍﻟﻤﺼﻄﻔﻰ ﺍﻟﻤﻘﺒﻮﻝ ..

*****

طشاش

طشاش ضارب زوايا القلب 

وجدران الغنا المايلات

عليك متوسمات شجنك ..

وجع داكن 

دفر باب عُزلَتَك في الروح

مرق من غربتو وسكنك .. 

تمزق صبرك الزايف ..

ولا خايف .. 

قميصو المن دبر مقدود   

يلتِّق فتقو  من كفنك   ..

درب عاكس جمال ظنك 

رماك في خطوة ودرانـة .. 

وسَمَاك في غيم غياب دفنك .. 

ولا رطن المدى وغَّنَّـاك 

ولا فَـنَّاك لسابع جو  

ولا مرق البكا  المكنك.. 

وناديتك 

رجع ماهِلْ صدى صوتك 

معافى من الزمن ذات وحشـة إتقفيت أتر بُكراك ..

دَخَلْتَ علي عتامير الشقى الما فيها ريحة نيل   

ولا  منديل يشيل ذكراك .. 

تَوَسَّمْتَ الرحيل في عِزة من طبع الحراز والليل  يضلل في سما الإدراك ..

رميت ودع اشتهاك يا ضي 

عسى ولعل 

يَحَمِّدْني القبيل وَدَّاك ..



وناديتك 

وهيب يا صاحبي 

يا أقرب رمش للعين

ويا ضحكة غبش في هاجرة

يا لمة صحاب في زين .. 

ويا جرتق شهيد في دمي 

يوم عرس البلاد  نصرين ..

ويا قدلة حروف في نمي ..  

عَدَّال العوج والشين ..

وناديتك  نهاراتك غبش يا صاحبي ..  

هبت عيتَبيتَك فيني نَفَّضَتْ الوجايع ضُمَّـة ..

شفتك يومي بتشَتِّت بذور الرحمـة فوق ارضي المتاورة الحُمَّى .. 

وكتين فاتوا كل اصحابي

وحدك يا العليك بتسَمَّى .. 

باقي مع القلب دقاتو

في الوقت التَّوِح ساعاتو

في الفرح  النقص ما تَمَّ ..



بتوكــــاك ..

وفي الحزن المعشعش جوَّة  في عين التَّفِقْدو وليدا ، بترجاك ..

وفي النفر البينفروا جملـة لي عازه ويحلحلو قيدا ،  بستناك .. 

وفي الوجع البطيب بي شوفتك التاخدني لا عند الرفاقـة هناك ..

ولوفك صاحي

لا اترايم سقف ذكراهو 

لا شوقو المهرجل نام .. 

وفي عينيك بشوفو ينادي :  

حَيَّ على البلد يا صاحي أرمي القدرة  لي قدام .. 

واشوفك في الطريق يا صاحبي  

قنديلاً يهش العتمة ناراً باقيـة برد وسلام .. 

واشوفك في الحريق طَفَّاي لهايب جوفي 

تتوزع على الجتـة و تخش في حضرة الأنسام .. 

تربت كفك المتخذة شكل الغيم  ،

وحنية الرزاز ،

والمطرة  سَقَّاية الزرع والطير ، 

ورَضَّاية  الوقع ما  قام .. 

ورّبَّاية الولاد الشهدا شّيَّالين تقيلة الويل 

دروق الجاي من الايام ..

وهيب يا صاحبي 

متقَسِّم شقاي بيناتنا ..  

ناعسة معاك جروح الروح ..  

وباردة جهنم الأشواق ونيران البكا المفضوح ..  

مراويدك تكحل قلبي صبر جميل 

وقلبك قلبو باب مفتوح .. 

اشوفك خوفي يتعتر ..  

تقع في عيني نقطة ضو ..  

واقودك نترسم قمرين

على صفحة غلاف الجو ..  

ونتشايل سهرنا  عمرنا  

نتوقَّى الزمان السو .. 



ويا صاحبي البريتك لا شكك لا زيف ..  

طريتك ذات شجن خشاني ،

 صرت على العلي خفيف ..  

وجيتك كلي ما أضناني 

جنبك ما فقدت خريف ..  

ولا هماني جرحي الني  

ولا وجع الغُـنا الكيِّيف ..  

أيا البحر الطمح بي خيرو 

رغم الفاجعة رافق سيرو   

قلبي الما  وعى التجديف .. 


****** 

نوازع الروح

ﺿﻬﺒـﺎﻥ ، 

ﺿِﻬِﺐ ﻓﻴـﻚ ﺍﻟﻄـﺮﻳﻖ

ﺑﺎﻗـﻲ ﺍﻟﻤﺴﺎﻓـﺎﺕ ﺍﻟﺸﻤـﻮﺱ

ﺍﻟﻮَﻟَّﻌــﺖ ﺟــﻮﻓﻚ ﺣــﺮﻳـــﻖ ..

أﻣﺸﻴﻬﺎ ﻣﺎ ﺗﻤﺸﻴـﻚ ﻏﻴـﺎﺏ

ﻛـﻞ ﺍﻟﻘﺼـﺎﻳﺪ ﻣﻌﺠـﺰﺍﺕ ، 

ﻭﺍﻟﺸﻌـﺮﺍ أﻧﺼـﺎﻑ ﺍﻧﺒﻴﺎﺀ ..

ﺍﻟﺠﻨـــة : ﻋﻴﻨﻴـﻦ ﺍﻟﺤﺒﻴــﺐ .. 

ﻭﺍﻟﺒﻴـﺖ : ﻣﺤﻨـة ﻭإﺣﺘــﻮﺍﺀ ..

ﻭﺍﻟﻨَّـــﺎﺭ : ﻋـﻄﺶ ﺷـﻮﻓـﻚ ﻭﻛـﺖ ﻣـﺎ ﻳﺒﻠُــﻮ ﺭﻳـــﻖ ..

ﻳـــﺎﻝ ﺍﻟﻄــﺮﻳــﻖ .. ﺍﻟﻤﺎﺷـﻲ ﻓـﻲ ﺟﺮﺣﻚ ﻋـﻮﺝ ..

ﻳﺎ ﻣﺴﺘﻘﻴــﻢ ﺍﻟﻔﻜـــﺮة ﻣﻌــﺪﻭﻝ ﺍﻟﻮَﻫَـــﺞ ..

ﺣﺰﻧــــﻚ : ﺟﺴـﺮ ﻟﻲ ﺑﻜـﺮة ﻋﺪﻣﺎﻥ ﻣـﻦ ﺗﻌـﺐ ﻣـﻦ ﺣﺴـﺮة

ﻣـﻦ ﺧـﻮﻑ ﻣـﻦ ﺯﻫـــﺞ ..

ﺑﺎﻛــــﺮ : ﻧَﺪﻯ ﺍﻟﻠﻴﻠـة ﺍﻟﻤﻌﺘَّﻖ ﺑﺎﻟﺴَّﻤَﺎﺡ ..

ﻓﺠـــﺮﻙ : ﺷــﺮﻭﻕ اﻓـــﻜﺎﺭ ﺗﺴﺎﻟـﻢ ﺍﻟﻮﺍﻗـﻊ ﻭﺗـﻼﻭﻱ ﺍﻟـﺮِّﻳـَﺎﺡ ..

ﻟﻴــــﻠﻚ : ﺻﺒـــــــــــــﺎﺡ ..

ﺣﺮﻓــﻚ : ﻃﺮﻳﻘــﻚ ﻟﻠﺠﻨـــــﻮﻥ ..

ﻇﺮﻓــﻚ : ﻳﻘﻴﻨــﻚ ﺇﻧــﻮ ﺧﻴـــﺮ

ﻭﺍﻟﺤـﺐ : ﺗﻜُــﻮﻥ ﺃﻭ ﻻ ﺗﻜُــﻮﻥ ..

ﺷﺮﻋــﻚ  ﺗﺠـﺎﻭﺯ ﻗــﺪﺭﺗﻚ

ﻓــﺮﻋــﻚ ﻭﻻ ﻓـﻲ ﺑﺎﻟـﻮ ﻃﻴـــﺮ ..

ﺍﻟﻨـَّـﺎﺱ : ﺣﺒﻴﺒـﻚ .. ﻭﺍﻧـﺖَ ﺑـﺲ

ﻭﺃﻭﻝ ﻏﺮﺍﻣــﻚ ﻫــﻮ ﺍﻷﺧﻴـــﺮ ..

ﺿُــﻠّـﻚ : ﻣـﻼﻙ ﺣــﺎﺭﺱ ﺧُــﻄﺎﻙ

ﻛُـﻠﻚ ﻋﻠـى ﺑﻌـﻀــﻚ ﻣـﻌـــﺎﻙ ..

ﻟﻐﺘـــﻚ ﺗﻔـﻚ ﺍﻹﺷْﺘِﺒــﺎﻙ

ﻣﺎ ﺑﻴــﻦ ﺭﺅﺍﻙ .. ﻭﺍﻵﺧـــﺮﻳﻦ ..

ﻣﺎ ﺃﺣﻠـﻰ ﻣﺎ ﻓﻴـﻚ ﻣﻦ ﺣــﻨﻴﻦ .. ﻣﻄــﺮة ﻭﺩﻋـــﺎﺵ ..

ﻟﻜﻨــﻲ ﻓـﻲ ﺷﺮﻋﻚ ﺣــــــﺮﺍﺯ ..

ﻭﺍﻗﻒ ﻗﺼـــﺎﺩ ﻣﻠﻴﻮﻥ ﺑﺤـﺮ

ﻣـﻊ ﺇﻧـﻲ ﻣﺎ ﺷﺎﻳﻒ ﺍﻟـﻣـــﻼﺫ ..

ﻫﺰﻳـﺖ ﺟـﺰﻉ ﻧﺨــﻞ ﺍﻟﻈـﺮﻭﻑ

ﻣﺎ ﺳـﺎﻗﻂ ﺍﻻ ﺍﻟﻤﺴﺘﺤﻴــﻞ ..

ﻟﻤﻠﻤﺘــﻮ ﻓـﻲ ﺧُـﺮﺝ ﺍﺣﺘـﻤــﺎﻝ

ﺍﻧﻘــﺪ ﺩﻓَّــﻖ ﻣﻨـــﻮ ﻧﻴــــﻞ ..

ﻻﻭﻳﺘــﻮ ﻣﺎ ﺧﺎﺑـﺖ ﻗُــﻮﺍﻱ

ﻛﺎﻭﻳﺘــﻮ ﺑﻲ ﺻﺒﺮﻱ ﺍﻟﺠﻤﻴﻞ ..

ﻧﺎﺩﻳﺘــﻮ ﻣــﺎ ﻃﺎﻟﺒﺘـــﻮ ﺭﺍﻱ 

ﻟﻜﻨــﻮ ﺇﺧﺘــــﺎﺭ ﺍﻟﺮﺣـــﻴﻞ ..

ﻛﻞ ﺍﻟﺮﻭﺍﻛﻴﺐ ﺍﻧْﺘَﻜــﺖ

ﺫﺍﺕ ﻧﺴﻤـة ﻓﻲ ﺣُﻀـﻦ ﺍﻟﻔـﺮﺍﻍ ..

ﻧﻴﻤـﺎﺗـﻚ ﺍﻟﻔـﻲ ﺍﻟـﺮﻭﺡ ﺭﻣَـﺖْ ..

ﺻﻔـﻖ ﺍﻟﻤﺸﺎﻭﻳــﺮ ﺍﺷﺘﻴـــﺎﻕ ..

ﺣﺘَّـﺘﻨــﺎ ﻣﻨﻬـﺎ ﻃﻴـﻦ ﺣﺰﻳـﻦ

ﺳﻜﺘﻨﺎ ﺧـﻮﻓﻨـﺎ ﻋـﺪﻡ ﻳﻘﻴـﻦ

ﻭﺍﺟﻌﻨـﻲ ﺍﻧــﻮ ﺍﻟــﺪﺭﺏ ﺷﺎﻕ ..

ﻧﻔـﺾ ﻫﻤـﻮﻣﻚ ﻳﺎ ﺑﺤـــﺮ ..

ﻣﺎ ﺗـﺪﻱ ﺧﺎﻃــﺮﻙ ﺍيي ﻗﻴــﻒ 

ﻣﻮﺟــﻚ ﺍﺫﺍ ﺑﺎﻟﻔﻴـﻬــﻮ ﺿـــﺎﻕ ..

ﺍﺗﺴﺎﻣــﻰ ﻣﺎ ﺍﺟﻤــﻞ ﺗﻜــﻮﻥ

ﻏﻴﻤـــة ﻭ ﺗـَﺮِﻙ ﻓﻲ ﺑـﺎﻝ ﺳﻤﺎﻱ ..

ﺇﺗﻠﻔﺖ ﺍﺳـﺮﺡ ﻓﻴﻨـﻲ ﻓﻴـﻚ

ﺇﺗﻐﺎﺑــﻰ ﺣُﺰﻧــﻲ ﺍﻟﺠـﺎﻙ ﻣﻌــﺎﻱ ..

ﺇﺗﻤـــﺎﺩﻯ ﻭ ﺍﻟﻀــﻲ ﺿﻔﺘﻴــﻦ

ﺇﺗﻬـﺎﺩﻯ ﻭ ﺍﻗـﺪﻝ ﻓـﻲ ﻣــﺪﺍﻱ ..

ﻳﺎ ﺍﺭﺣـﻢ ﺍﻟﻔﻴﻬـﻢ ﺳﻬﻴــﺖ

ﺃﻧﺎ ﻗﻠﺒــﻲ ﻣﺎ ﻫـﻮ ﻗــﺪﺭ أﺳﺎﻱ ..

ﺧﺒﻴﻨــﻲ ﺟــﻮﺍﻙ ﻳﺎ ﺑﺤــﺮ 

ﺟﻴﺘــﻚ ﻋﺸــﻢ

ﻣﺘـﻮﻛـﻲ ﺧﻴﺮﺍً ﺷﻔﺘـﻮ ﻓﻴـﻚ ،

ﻟﻜﻨـﻲ ﻣﺎ ﺟﻴﺘـﻚ ﻣﻌـﺎﻱ ..

ﺿﻴﻌﻨـﻲ ﻓـﻲ ﺩﺭﺑـﻚ ﺣِﻠـﻢ

ﺃﺩﺭﻛﻨـﻲ ﻣـﺎ ﺃﺩﺭﻛﺖ ﻛﻴﻒ ﺃﻧﺴﺎﻫـﻮ ﺃﻭ ﺍﺭﺟـﺎﻫﻮ

ﻭلَّا ﻣـﻊ ﺍﻟﺼﺒـﺎﺡ اﻗﺮﺍﻫـﻮ ..

ﺃﻧﺸــﻮﺩﺓ ﻣﺤﻨَّــة  ﻭﻧﺨﻠـة

ﻓـﻲ ﺍﺭﺿﺎً ﻣﻮﺍﻟﻔـة ﺳﻤﺎﻫﻮ ..

ﻳﺎ ﺁﺧـﺮ ﻧـﻔـﺲ ﻣﺎﻟﻴﻨــﻲ

ﻣـﻦ ﺭﺋـﺔ ﺍﻟﺤﻘﻴﻘـة ﻛﻔﺎﻫـﻮ ..

ﺃﺷﻬـﻖ ﻻ ﺗﻔﻀـﻞ ﻓِـﻴﻨِـﻲ

ﺭﻭﺡ ﻟـﻲ ﺣﻠـﻢ ﺗﺎﻧـﻲ ﻭﺭﺍﻫﻮ ..



ﻳﺎ ﺍﻧْﺴـﺎﻡ ..

ﺗﺨُﺸـﻚ ﻟﻮ ﻣـــﺮﻕ

ﺻﻮﺗـﻲ ﺍﻟﺤـﺰﻳﻦ ﻧـﺎﺩﺍﻙ ..

ﻣﻌﻠّـﻖ ﻓـﻲ ﻟﻬﺎﺗـﻚ ﺑــﻮﺡ

ﺷﻨـﻮ ﺍﻟﻐﻴـﺮ ﺍﻟﺴﻜـﻮﺕ ﺩﻻﻙ ..

ﺷﻨﻮ ﺍﻟﻤـَـﺎ ﻏﺒَّـﺶ ﺍﻟﺒﻴﺒـــﺎﻥ 

ﻣِﻨـﻮ ﺍﻟﻤﺴـﺢ ﺍﻟﻔﺠﻴﻌـة ﻭﺭﺍﻙ ..

ﺍﺫﺍ ﺍﻧﻜﺴـﺮ ﺍﻟﻘﻠـﻢ ﻳﺎ ﺑﻮﺡ

ﺑﺴﻄِّـﺮ ﺑـﻲ ﻣـﺪﺍﺩ ﺍﻟـﺮُﻭﺡ

ﻣﺤـــﺮﻡ ﺍﻱ ﺭﻳـــﺪ ﺇﻻﻙ ..

ﺷﻨـﻮ ﺍﻟﺨـﻼﻙ .. ﺗـﻮﺍﺭﻱ ﺍﻟﻠﻬﻔـة  ﻭﺍﻷﺷـﻮﺍﻕ

ﺗﺼُــﺪ ﻣﺠُـــﺮﻭﺡ ..

ﻭﻣﺎ ﺍﻗﺴﻰ ﺍﻟﺴﻜﺎﺕ ﻟﻮ ﻛﺎﻥ ﺣــﺮﻑ ﺑﻮﺣﻚ ﻳﻐﻠﺒُـﻮ ﺍﻟﺒــﻮﺡ ..

ﻛﺘﻴـﺮ ﺑﺘﻌﻠِّــﻢ ﺍﻻﻳـَّــﺎﻡ

ﻭﻻ ﻛﻞ ﺍﻟﺤﺼـﻞ ﻛـﺎﻥ ﺗﺎﻡ

ﻭﻻ ﻛـﺎﻥ ﺍﻟﺮّﺟُـﻮﻉ ﻣﺴﻤﻮﺡ ..

ﺗﻌــﺎﻝ ﻭﺳِّـﺪ ﺣﻨﻴﻨـﻚ ﻓــﺎﻝ ..

ﺑﺤـﺮ ﻣـﺎ ﺳـﺪّ ﺑﺎﺑـﻮ ﻭﻗــﺎﻝ ..

ﻛﻔَـﺎﻧِــﻲ ﺟُــــﺮﻭﺡ ..

أﻳﺎ ﻣﺸﺮﺑﻜﻨﻲ ﻓﻴﻚ ﺍﺷﻮﺍﻕ

ﻛﻤﺎ ﻣُﺘﺸﺮﺑِـﻜﺎﻙ ﺍﻟــﺮُﻭﺡ ..



ﻣﺪﺍﻳــﻦ ﺣﺰﻧـﻲ ﻣـﺄﻫـﻮﻟـﺔ ﻓـﺮﺡ ﻏﺎﻳﺐ ..

ﻭﻻ ﺩﺭﺑـﺎً ﻳﺴـﻮﻗﻚ ﻣﻨـﻲ ﻛﺎﻥ ﺟـﺎﻳـﺐ ..

ﻭﺭﺍﻙ ﺍﻓــﺮﺍﺡ ..

ﺗﻘﺎﻗِﻴﺐْ ﺍﺷﺘِﻬﺎﻱ ﺑَﻘَّـــﺖ

ﺟِﺮﺍﺡ ﻣِﻦْ ﻓـﻮﻗـﺎ ﺗﺎﻧﻲ ﺟــﺮﺍﺡ ..

ﺑﻌﺪ ﺭِﺳَـﺖ ﺍﻟﻘﻮﺍﻓـﻲ ﻋﻠﻴــﻚ

ﺳـَـﺮَﺏ ﺣُـﻮﺕ ﺍﺣﺘﻤﺎﻟـــﻲ ﻭﺭﺍﺡ ..

أﻳﺎ ﺍﻟﻤﺎﻟﻴﻨﻲ ﺿﻠﻤــة ﻭﻟﻴـﻞ ، 

ﻣﺘﻴﻦ ﻣﻨﻚ ﻳﺠﻴﻨــﻲ ﺻﺒــﺎﺡ ..!؟


******

نوفمبر/2013