دندنة شوق

زفة احلام 

صدفة سمحة 

فرحة سايقة فى ايدا فرحة 

وضحكة اطفال 

عبــــوا ناديك ..

غنــــى عصفور 

صَحَّى عينيـــك ..

دفــَّـــــــق النور 

في بواديك ..

قرَّب الخير مـــد اياديك ..

يا الوسط روحي وبناديك ..

من رحيح اللهفة في الروح العنيدة .. 

ومن صريح المعنى في الفكرة الوليدة .. 

مِنِّي من وجع المسافات البعيدة .. 

بيحيـــــا نبض الفرحة في قلب القصيدة ..

بيني والاقلام حكاوي 

وقصة عَنَّك ما غريبة ..

فرحة ضلها رامي فوقك 

وضحكة من إيدك قريبة ..

بيني والمشوار عيونك 

زادي في السكة الصعيبة .. 

وبيني والأقدار أكونك 

في المواقيت الرحيبة ..

أبقى عارف 

يوم تفرتق من ضفيرة الليل سبيبة ..

بتندلع جواي غناوي 

وتندهك بالشوق حبيبة ..

يا المسافر فيني راجياك بالبشاير..

يا الموالف ديمة والأيام دواير..

يا المطابق قولي بالفعل المساير..

يا البترميك قلوة البن 

قدلة السمحة ام مساير..

إيدي فوق ايدك نلوِّح 

لليمامات التسافر 

من مداين الوحشة لي قيف المرافي ..

للغمامات البترقص 

في قفا القمر اللي مافي..

وللنجيمات البيلهب نورا سُمَّـــــــار القوافي ..

ايدي فوق ايدك نصافي ..

نرمي بذرة بكرة احلى وخير مُوافي ..

ونطرد الوجع البيفتح  فينا شباك المنافي ..

إيدي فوق إيدك كفـــاية ..

يندلق ضي من عيونك 

في انعكاسات المـــرايا ..

ترسم الحرِّيَّة إيدك 

لوحة مكتملة زوايا ..

وفي بلاد الخير نشيدك 

فال مواسم سمحة جاية ..

غنـــوا لي الليل يا مواجيد .. 

ولِّعـــــوا الليل بالزغاريد ..

لا ملامات

لا ضلامات

لا ضحايا ..

******

14/4/2015