رهق الكلام

ﺩﺍﺭﺕ ﺩﻭﺍﻳﺮ ﺍﻟﺪﻧﻴﺎ ﺑﻴﻚ

ﻭﺍﺗﺸﺒﻌﺖ ﺑﻲ ﻃﻴﻨﻚ ﺍﻟﻤﺒﺮﻭﻙ ﺑﻼﺩ ..

ﺍﺗﺸﺠﻌﺖ ﺗﺴﺮﻕ ﻣﻼﻣﺢ ﺍﻟﻔﻜﺮة ﻓﻴﻚ ..

ﻭﺍﺗﻮﻗﻌﺖ ﻧﺎﺭﻙ ﺗﻬﺰ ﺍﻳﺪ ﺍﻟﺮﻣﺎﺩ ..

ﻣﺘﺒﺎﺧﺘـة ﺑﻲ ﺟﻴﺘﻚ ﻣﺪﺍﻳﻦ ﺍﻟﻄﻴﺒﻴﻦ

ﻳﺎ ﻛﺮﻧﻔﺎﻝ ﺷﻤﺴﺎً ﺗﻔﺞ ﻟﺠﺞ ﺍﻟﺴﻮﺍﺩ ..

ﺟﻴﺖ ﻣﻦ ﺑَﻄُﻦ أﺭﺣﻢ ﻏﻤﺎﻣـة ﺍﺗﺠﺮﺩﺕ

ﻭﺍﺗﻤﺮﺩﺕ ﺿﺪ ﺍﻟﺠﻔﺎﻑ ..

ﺟﻴﺖ ﻣﻦ ﺗﻮﺍﺭﻳﺦ ﺍﻷﺳﻰ ﺍﻟﻠَّﻮَّﻥ ﺳﻨﻴﻦ ﻋﻤﺮﻱ ﺍﻟﻌﺠﺎﻑ ..

ﺟﻴﺖ ﻣﻦ ﻋﻴﻮﻥ ﺍﻣَّﺎﺕ ﺑﺘﺮﺷﻊ ﺷﻮﻕ ﻭﺣﻨﻴـة ﻋﻔﺎﻑ ..

ﺟﻴﺖ ﻣﻦ ﺿﻔﺎﻑ

ﻣﻤﺘﺪة ﻓﻲ ﺧﺎﻃﺮﻱ ﺍﻟﺤﻠﻢ ﺑﻴﻚ ﺗﺒﻘﻰ ﻧﻴﻞ ..

ﺍﻭ ﺗﺒﻘﻰ ﻟﻠﺮﻳﺪ ﺳﻠﺴﺒﻴﻞ ..

ﺍﻭﻋﺎﻙ ﺗﺨﺎﻑ ..

ﻛﻞ ﺍﻟﺤﺮﺍﺯﺍﺕ ﺗﺸﺒﻬﻚ

ﺷﺎﻥ ﻓﻴﻬﺎ ﻧﻔﺲ ﺍﻟﻜﺒﺮﻳﺎﺀ ..

ﺍﻟﻤﺎ ﺍﻧﻜﺴﺮ ﻟﻲ ﻧﻴﻞ ﻋﺒﺮ

ﺍﻭ ﻟﻲ ﻣﻄﺮ ﻣﺎﺭﺱ ﺭﻳﺎﺀ ..

ﻭﺍﻟﻤﺎ ﺭﻓﻊ ﺭﺍﺱ ﻟﻲ ﺑﺮﻕ ﺷﻖ ﺍﻟﺴﻤﺎﻭﺍﺕ ﻓﻲ ﻋﺠﻞ

ﺷﺎﻥ ﻳﺮﻣﻲ ﺗﻴﺮﺍﺏ ﺍﻟﻀﻴﺎﺀ ..

ﺍﻧﺎ ﻋﺎﻳﺰة ﺍﻏﻨﻴﻚ 

ﻳﺎ ﺍﻟﻤُﺤِﻖ ﻏﻨﻮﺍﺗﻲ ﻓﻴﻚ ..

ﻛﻞ ﺍﻟﺤﺮﻭﻑ ﺗﻌﺠﺰ ﺗﻘﻴﻔﻠﻚ ﻓﻲ ﺣﻴﺎﺀ ..

ﻭُﺩِﻱ ﻳﺎﺕ ﺣﺮﻭﻑ ﺗﻘﺪﺭ ﺗﻠﻤﻚ ﻣﻨﻲ ﻳﺎ ﺁﺧﺮ ﺭﺟﺎﺀ ..

ﻟﻲ ﺑﻜﺮة  ﺯﻳﻦ ..

ﺍﻧﺎ أﻣﺸﻲ ﻭﻳﻦ ..؟

ﻓﺎﺭﺽ ﻋﻠـى ﺣﺴﻨﻚ ﺣﺼﺎﺭ ..

ﺩﺍﺭﺕ ﻛﻮﺍﻛﺒﻲ ﻗﺼﺎﺩ ﻣﺪﺍﺭ ..

ﻋﻴﻨﻴﻚ ،  ﻭﺣﺎﺗﻚ ﺗﻬﺖ ﻓﻴﻚ

ﺻﺎﺩﻓنﻲ ﻓﻴﻚ ﻭﻋﺪﺍً ﻗﺪﻳﻢ ..

ﻻﻗﻴﺘﻨﻲ ﻓﻲ أﺟﻤﻞ ﺳﺪﻳﻢ ..

ﺣﻠﻤﺎً ﺭﺣﻴﻢ  ﺫﻛﺮﻧﻲ ﺑﻴﻚ ..

ﺧﻼﻧﻲ ﺯﻱ ﺷﺎﻳﻔﺎﻧﻲ ﻓﻴﻚ ..

ﻳﺎ ﺯﻭﻝ ﺻﺒﺎﺡ ﺍﻟﺤﻦ ﻋﻠﻴﻚ ..

ﺻﻮﺗﻚ 

ﻣﻼﻣﺤﻚ 

ﻓﻜﺮﺗﻚ 

ﺣﺰﻧﻚ  

ﺻﻤﻮﺩ ﺻﺪﻗﻚ 

ﻫﻮﺍﻙ ..

ﺍﺷﺮﺍﻗﺔ ﺍﻟﺸﻮﻕ ﺍﻟﻜﺒﻴﺮ ..

ﻛﻞ ﺍﻟﺘﻔﺎﺻﻴﻞ ﺍﻟﻌﺬﺍﺏ

ﺗﺸﺒﻬﻨﻲ ﻳﺎ ﺁﺧﺮ ﺭﺑﻴﻊ

ﺣﺎﺻﺮﻧﻲ ﺑﻲ ﺣﺴﻨﻮ ﺍﻟﺒﺪﻳﻊ

ﻓَـﻨَّﺎﻟﻮ ﻓﻲ أﻳﺎﻣﻲ ﻓﺎﻝ ..

ﻓﺮﻫﺪ ﺯﻫﻮﺭﻥ ﺑﺎﻟﻮﺻﺎﻝ ..

ﺍﺩﻫﺸﻨﻲ ﺣﺠﻢ ﺍﻟﺼﺪﻕ ﻓﻴﻚ

ﻳﺎ ﺳﺎﻛﻦ ﺍﻟﻀﻠﻊ ﺍﻟﺸﻤﺎﻝ ..

ﺍﻧﺎ ﻓﻴﻚ ﺑﺸﻮﻑ ﺍﻫﻠﻲ ﺍﻟﻐﺒﺶ

ﺟﻮﺍﻙ ﺑﺸﻮﻑ ﻭﻃﻨﻲ ﺍﻟﻜﻔﻴﻒ ..

ﺣﻦ ﺍﻟﻌﺼﺎﻓﻴﺮ ﺍﻟﺘﺴﻮﻕ

ﺟﻨﻴﺎﺗﺎ ﻟﻲ ﺍﻟﺒﻠﺪ ﺍﻟﻮﺭﻳﻒ ..

ﻃﻴﺒﺔ ﺍﻟﻤﺰﺍﺭﻋﻴـة ﺍﻟﺒﺴﺎﻁ

ﺧﺎﻃﺮ ﺍﻟﻤﺮﺍﻛﺒﻴـة ﺍﻟﻨﻀﻴﻒ ..

ﻟﺤﻦ ﺍﻟﻤﻐﺎﺭﺏ ﻭ ﺍﻟﻨﺴﻴﻢ

ﻗﻤﺮ ﺍﻟﻌﺸﻴﺎﺕ ﺍﻟﺘﻤﺎﻡ ..

ﺍﻧﺎ ﻟﻴﻚ ﺑﻘﻴﻒ ﺗﻌﻈﻴﻢ ﺳﻼﻡ ..

ﻳﺎ ﺟﺎﻳﻲ ﺯﻱ فجراً ﺟﺪﻳﺪ

ﻳﻬﺰﻡ ﺟﻨﻮﺩ ﻫﺬﺍ ﺍﻟﻈﻼﻡ ..

ﻳﻌﺪﻡ ﺗﻔﺎﺻﻴﻞ ﺍﻟﺨﻔﻮﺕ

ﻳﻤﺴﺢ ﺧﻴﻮﺕ ﺍﻟﻌﻨﻜﺒﻮﺕ

ﻳﻤﻼ ﺍﻟﻌﻮﺍﻟﻢ ﺑﺎﻟﺴﻼﻡ ..

ﻳﺎ ﺍﻟﻔﻴﻨﺎ ﺣﺴﻚ ﻣﺎ ﺑﻤﻮﺕ

ﺧﻠﻴﻨﻲ ﺍﺣﻜﻴﻚ ﺑﻲ ﺳﻜﻮﺕ ..

ﻭﺍﻋﻔﻴﻨﻲ ﻣﻦ ﺭﻫﻖ ﺍﻟﻜﻼﻡ ..



*****

2013