حنين

تاكيت عليك باب المودات القديمة  وإنتكيت

يا صاحي في كتفك بكيت .. 

وين القى منديل الغنا .. ؟

يا صاحي والليل الغتيت

إتمدّ في القلب الوحيد

الباكي معطوب السنا ..

ويا صاحي وكت الناس غلط ..

ضلي البهش بيهو الهجير  ..

يحميني من رمض العَنا   ..

وأوَّل حرف في لُغَتي وكتين الكلام يتوارى خلف الطنطنـة ..

يا صاحبي ياك لحْني البِسِل سكينو في وش النشاز .. 

مطري اليَمِد خيراتو قُبَّال ما يَصَل يبعتلي  مرسالو الرزاز  ..

طير المحبـة الوين نَقَد قندول غناهو  شِبِع ،

وَقَد في دمي موجات الحنين  ..  

في قلبي غابات  الحراز ..

إيدك علي جرحي بْتَرَبِّتْ كان يطيب ..

نتقاسم الليل أُحْجِيـة ..

حجِّيهو بالشوق يا وهيب

قول ليهو بعدك يا حبيب 

فتَّرنا حيل الأُمسيـة ..

ويا صَي قبيل يمَّمتَ وجه الكِلمة شطرْ الأُمنيـة .. 

وذرفتَ دمعة روحي في خد السنين

ونزفت أُغنيـة أُغنيـة  .. 

وصليت ولا فاكر وضو ..

ضليت ولا كايس الهدى 

ودرباً ولا بجيبك علي 

أو ما بِسُوقني عليك وحاتك بَرْفُضو .. 

خليت وراي كل القرى التنبح رواكيبن 

تَنِح تحت الشموس اللسة رقراقن بِوِح ما لاقي حيطة تروّضو .. 

وتمسح عرق صبري البعد روحتك هناك للجنة ..  الله يعوّضو ..

ويا صي بقيت ودران انادي السابلة 

وين القِبلة  ؟

وين الإتجاه ؟ 

وين الأَتَر ..؟

ضِحْكَتْ عليَّ السكة من فَرْط المشاوير الضجر   ..

وانا في العتامير التموت وديانا عطشانات بفتش عن بحر..!

او عن شدر مُتقريف الرَشَّـة التطيِّب خاطرو من جُرح الجفاف ..  

او عن قمر 

ذات غفلـة شاف

في غيمة وحلان المطر  ..

يا صاحبي والايام ســـــواد .. 

في عينو كنت بشوف منامي الليلـة صِرت بشوف سهـــــــــاد .. 

في وينو رايح صوتي  من شجن البعـــــاد ..

في طينو عز المنفى كنت بشوف بــــــلاد ..

تشبه امانينا المجرتقة خير وفال وصبر جميـــل   .. 

تشبه سَمَار القهوة وكتين تنتشي وتعزف غناوي الجنزبيــــل ..

تشبه فخامة نيمة في لحظة مقــيل .. 

تشبهني وكتين يندفق حبر الكتابة عليهو  نيـــل .. 

يا الله لو طال انتظاري علي رصيف الذكرى يوم اتوقَّعـــــو .. 

اديني طيفو عليك كمالك جيبو لي وارحم عيون إتوَجَّعــــو ..

شيل المسافات البقت بيناتنا .. 

شيل الفــُرْقة

شيل الحـُرْقة

قَـــــــدَرَك   وَقِّــعـــــــو .. 

وشيل روحي ذاتا اذا رضيت 

شيل ايِّ حاجة و رَجِّـــعــو ..


******