وحيح

مالو ليلك خبا نجمو وزاد سوادو.. 

مالو نيلك لسه سايق في عنادو..  

مالو قلبك كلما يحلم يطش في الروح مرادو..  

ومالو كيَّالك سرف قلبك مواجع و تاني زادو..

قولي للعابرين سبيلك  والصحاب الفي براحك..  

اسأليهم وين صباحك ؟ 

وقولي ليهم لي شنو عاجباهم جراحك..؟

والحبايب ايد بتكتل ووش يضاحك..

عاد يجيرك الله من طعن الخناجر.. 

والحروف الزايفـة ما فايتـة الحناجر.. 

والصحاب البيك تتاجر كلما  تقع المصيبـة .. 

والغريبـة 

قصاد عيونك يرسمو الوجعـة 

الرهيبـة ..  

وبي وراكي يشمتو الناس في بكاكي 

وانتي تدفعي في الضريبـة .. 

عاد يجيرك الله من كل البخونو...

من حبيب شايلاهو في عيونك ولا شايفاك عيونو..

من صديق خاتالو قيمـة وعندو أحزانك يهونو ...

ومن زمان كشَّر قصاد صبرك  سنونو...

وعاد يجيرك الله  من الجايي كلو.. 

من مرارة الريد وذلو..

من غمام ما جاد بضلو..

ومن قرايب لسه فيكي بيستغلو...


******